ପୁରୀ: ଶ୍ରୀମନ୍ଦିର ପରିଚାଳନା କମିଟିର ବହୁ ପ୍ରତୀକ୍ଷିତ ବୈଠକ ଶେଷ ହୋଇଛି। ବୈଠକରେ ମହାପ୍ରଭୁଙ୍କ ନୂଆ ସୁନାବେଶ ନିର୍ମାଣଠାରୁ ଆରମ୍ଭ କରି ଶ୍ରୀଗୁଣ୍ଡିଚା ମନ୍ଦିରକୁ ଭକ୍ତଙ୍କ ପାଇଁ ଖୋଲିବା, ଦିବ୍ୟାଙ୍ଗଙ୍କ ସ୍ୱତନ୍ତ୍ର ଦର୍ଶନ, ପୁରୀବାସୀଙ୍କ ଦର୍ଶନ ବ୍ୟବସ୍ଥା ଓ ସେବାୟତ କଲ୍ୟାଣ ସମେତ ଏକାଧିକ ଐତିହାସିକ ପ୍ରସ୍ତାବ ଉପରେ ମୋହର ବାଜିଛି।
ମହାପ୍ରଭୁଙ୍କ ପାଇଁ ତିଆରି ହେବ ଆଉ ଏକ ସୁନାବେଶ
ବୈଠକର ସବୁଠାରୁ ବଡ଼ ନିଷ୍ପତ୍ତି ହେଉଛି ମହାପ୍ରଭୁଙ୍କ ପାଇଁ ନୂଆ ସୁନାବେଶ ଅଳଙ୍କାର ସେଟ୍ ପ୍ରସ୍ତୁତ କରାଯିବ। ଏହାକୁ ଶ୍ରୀମନ୍ଦିର ପ୍ରଶାସନ ନିଜସ୍ୱ ପାଣ୍ଠିରୁ ନିର୍ମାଣ କରିବ। ତେବେ ଇଚ୍ଛୁକ ଭକ୍ତ ଓ ଶ୍ରଦ୍ଧାଳୁ ସ୍ୱଇଚ୍ଛାରେ ଦାନ ମଧ୍ୟ କରିପାରିବେ।
ରତ୍ନଭଣ୍ଡାର ଗଣତି ସମୟରେ କରାଯାଇଥିବା ଭିଡିଓ, ଫଟୋ ଓ ଡିଜିଟାଲ ଡକ୍ୟୁମେଣ୍ଟେସନକୁ ଆଧାର କରି ପାରମ୍ପରିକ ଆକୃତି, ଓଜନ ଓ ଧାର୍ମିକ ପ୍ରାମାଣିକତା ବଜାୟ ରଖି ଏହି ଅଳଙ୍କାର ପ୍ରସ୍ତୁତ ହେବ। ଏଥିପାଇଁ ଏକ ଟେକ୍ନିକାଲ କମିଟି ଗଠନ କରାଯିବ ଏବଂ ଅନୁଭବୀ ସଂସ୍ଥାକୁ ନିର୍ମାଣ ଦାୟିତ୍ୱ ଦିଆଯିବ।
୩୦ ସେପ୍ଟେମ୍ବରରୁ ଖୋଲିବ ଶ୍ରୀଗୁଣ୍ଡିଚା ମନ୍ଦିର
ଭକ୍ତଙ୍କ ପାଇଁ ଆଉ ଏକ ବଡ଼ ଖୁସି ଖବର। ୩୦ ସେପ୍ଟେମ୍ବରରୁ ଶ୍ରୀଗୁଣ୍ଡିଚା ମନ୍ଦିର ସର୍ବସାଧାରଣଙ୍କ ପାଇଁ ଖୋଲିବ। ସକାଳ ୬ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଦର୍ଶନ ସୁବିଧା ରହିବ।
