ଭୁବନେଶ୍ୱର: ଓଡ଼ିଶାରେ ବନ୍ୟା ସ୍ଥିତିକୁ ନେଇ ଚିନ୍ତା ବଢ଼ିଥିବା ବେଳେ ଏବେ ନଜର ମହାନଦୀ ଉପରେ। ମୁଣ୍ଡଳୀ ବ୍ୟାରେଜ୍ରେ ଜଳପ୍ରବାହ ପ୍ରାୟ ୮ ଲକ୍ଷ କ୍ୟୁସେକ୍ ଛୁଇଁବା ଆକଳନ କରାଯାଇଛି। ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲ୍ଲୀପ ରାଉତ ଏନେଇ ସୂଚନା ଦେଇଛନ୍ତି। ରବିବାର ରାତିରୁ ମୁଣ୍ଡଳୀ ଦେଇ ମହାନଦୀରେ ଜଳପ୍ରବାହ ବଢ଼ିବା ଆଶଙ୍କା ଥିବାରୁ ତଳିଆ ଅଞ୍ଚଳ ଉପରେ ନଜର ରଖାଯାଇଛି।
ସର୍ବୋଚ୍ଚ ଯନ୍ତ୍ରୀଙ୍କ ସୂଚନା ଅନୁସାରେ, ଆଜି ଦିନ ୧୨ଟା ସୁଦ୍ଧା ମୁଣ୍ଡଳୀରେ ୭ ଲକ୍ଷ ୮୩ ହଜାର କ୍ୟୁସେକ୍ ପାଣି ତଳମୁଣ୍ଡକୁ ପ୍ରବାହିତ ହେଉଥିଲା। ସନ୍ଧ୍ୟା ସମୟରେ ଏହା ପ୍ରାୟ ୮ ଲକ୍ଷ କ୍ୟୁସେକ୍ରେ ପହଞ୍ଚିପାରେ। ତେବେ ସନ୍ଧ୍ୟା ପରେ ମହାନଦୀରେ ଜଳପ୍ରବାହ ଧୀରେ ଧୀରେ କମିବାର ଆଶା ରହିଥିବାରୁ ଏହା କିଛିଟା ଆଶ୍ୱସ୍ତିର ବିଷୟ।
୫ ଜିଲ୍ଲା ଉପରେ ନଜର
ମହାନଦୀର ଜଳପ୍ରବାହ ବଢ଼ିବା ଯୋଗୁଁ ବିଶେଷକରି କଟକ, ଖୋର୍ଦ୍ଧା, ପୁରୀ ଓ ଜଗତସିଂହପୁର ଜିଲ୍ଲାର ତଳିଆ ଅଞ୍ଚଳ ଓ ଚାଷଜମି ପ୍ରଭାବିତ ହେବା ଆଶଙ୍କା ରହିଛି। ସେହିପରି କେନ୍ଦ୍ରାପଡ଼ା ଜିଲ୍ଲାର ପଟକୁରା ଓ ଗରଦପୁର ବ୍ଲକ୍ର କିଛି ତଳିଆ ଅଞ୍ଚଳ ମଧ୍ୟ ପ୍ରଭାବିତ ହୋଇପାରେ। ମହାନଦୀର ବିଭିନ୍ନ ଶାଖାନଦୀ ଓ ନାଳଗୁଡ଼ିକର ଜଳସ୍ତର ଉପରେ ମଧ୍ୟ ନଜର ରଖାଯାଇଛି।
