ଭୁବନେଶ୍ୱର: ଓଡ଼ିଶାରେ ସରକାରୀ ଜମିର ବେଆଇନ ଦଖଲ, ଦୁରୁପଯୋଗ ଓ ବର୍ଷ ବର୍ଷ ଧରି ଅବ୍ୟବହୃତ ପଡ଼ିଥିବା ଜମି ବିରୋଧରେ ରାଜ୍ୟ ସରକାର ବଡ଼ ଅଭିଯାନ ଆରମ୍ଭ କରିଛନ୍ତି। ଏଣିକି ଲିଜ୍, ଅଗ୍ରୀମ ଦଖଲ (Advance Possession), ପରମିସିଭ୍ ପଜେସନ୍ ଓ ଆଲିଏନେସନ୍ ମାଧ୍ୟମରେ ବଣ୍ଟନ ହୋଇଥିବା ସମସ୍ତ ସରକାରୀ ଜମିର ଜିଲ୍ଲାଭିତ୍ତିକ ସମୀକ୍ଷା କରାଯିବ। ଏନେଇ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ସଚିବ ଡ. ଅରବିନ୍ଦ କୁମାର ପାଢ଼ୀ ସମସ୍ତ କଲେକ୍ଟରଙ୍କୁ କଡ଼ା ନିର୍ଦ୍ଦେଶ ଜାରି କରିଛନ୍ତି।
ଚିଠିରେ ଡ. ପାଢ଼ୀ ସ୍ପଷ୍ଟ କରିଛନ୍ତି ଯେ, ସରକାରୀ ଜମି ଏକ ମୂଲ୍ୟବାନ ଜନସମ୍ପଦ। ଏହାର ସୁରକ୍ଷା, ସଠିକ୍ ବ୍ୟବହାର ଓ ବେଆଇନ ଦଖଲ ରୋକିବା ସରକାରଙ୍କ ପ୍ରାଥମିକ ଦାୟିତ୍ୱ। ବିଶେଷକରି ପ୍ରଭାବଶାଳୀ ବ୍ୟକ୍ତି, ସଂଗଠନ କିମ୍ବା ସ୍ୱାର୍ଥଗୋଷ୍ଠୀ ସହ ଜଡ଼ିତ ମାମଲାରେ କୌଣସି ଚାପ କିମ୍ବା ପ୍ରଭାବରେ ନ ପଡ଼ି ଆଇନ ଅନୁସାରେ ନିର୍ଭୟ ଓ ନିରପେକ୍ଷ ଭାବେ କାର୍ଯ୍ୟ କରିବାକୁ ରାଜସ୍ୱ ଅଧିକାରୀଙ୍କୁ କୁହାଯାଇଛି।
୩ ବର୍ଷ ଧରି ବ୍ୟବହାର ହୋଇନଥିଲେ ହେବ ରିଜ୍ୟୁମ୍
ସରକାରଙ୍କ ନିର୍ଦ୍ଦେଶ ଅନୁସାରେ, ଲିଜ୍ରେ ଦିଆଯାଇଥିବା ସରକାରୀ ଜମି ଯଦି ସେଟଲମେଣ୍ଟ ପରେ ୩ ବର୍ଷରୁ ଅଧିକ ସମୟ ଧରି ଅବ୍ୟବହୃତ ରହିଛି କିମ୍ବା ଅନୁମୋଦିତ ଉଦ୍ଦେଶ୍ୟ ବଦଳରେ ଅନ୍ୟ କାମରେ ବ୍ୟବହୃତ ହେଉଛି, ତେବେ ଆଇନ ଅନୁଯାୟୀ ଜମି ପୁନଃ ସରକାରଙ୍କ ଅଧୀନକୁ ଫେରାଇବା ପ୍ରକ୍ରିୟା ତ୍ୱରାନ୍ୱିତ କରାଯିବ। ଏହା ଓଡ଼ିଶା ସରକାରୀ ଜମି ସେଟଲମେଣ୍ଟ ଆଇନ, ୧୯୬୨ ଓ OGLS Rules, 1983 ଅନୁସାରେ କରାଯିବ।
